Fiskeldi

Samherji hefur komið að landeldi á laxi og bleikju í yfir 20 ár og stór hluti starfsfólks stöðvanna býr að enn lengri reynslu, þekkingu og faglegri sérhæfingu. Þróun og stýring landeldis á Íslandi er með því besta sem gerist í heiminum og framtíð greinarinnar er björt.

Við höldum áfram að byggja ofan á einstaka þekkingu og framleiða hágæðaafurðir við bestu mögulegu aðstæður.

Það góða við landeldið

Þegar eldið fer fram í kerjum uppi á landi er hægt að hafa góða stjórn á öllum stigum. Fylgst er nákvæmlega með súrefni, seltumagni, þéttleika, sýrustigi og hitastigi og bestu mögulegu eldisaðstæður fyrir fiskinn tryggðar á hverjum tíma. Hætta á slysasleppingum er lítil sem engin. Laxalús þekkist ekki í landeldi.

Í sátt við umhverfið

Allar landeldisstöðvar Samherja nýta græna orku; jarðvarma og kristaltært borholuvatn til framleiðslu á hágæða eldisfiski. Við seiðaeldið er notað ferskvatn en ísaltur sjór við áframeldið. Markmiðið hefur ávallt verið að stunda sjálfbært og umhverfisvænt fiskeldi, lágmarka kolefnisfótspor og starfa í sátt við samfélagið. Í nóvember 2021 fékk Samherji Fiskeldi ASC umhverfisvottun á framleiðslu sína í landeldi á bleikju, en hún er ein strangasta umhverfisvottun heims þegar kemur að fiskeldi. Grænt bókhald hér

Hollur og góður matur

Fiskur hefur öldum saman verið ein af grundvallarfæðu Íslendinga, enda uppspretta nauðsynlegra næringarefna eins og próteins, ómega-3, joðs og D-vítamíns. Lax og bleikja úr landeldi Samherja er eftirsótt hágæðavara um allan heim, jafnt á heimilum sem hjá stjörnukokkum og gestum flottustu veitingastaða.

Lax og bleikja

Samherji rekur sex landeldisstöðvar fyrir bleikju og lax á öllum stigum víða um land, allt frá hrognaeldi til vinnslu og pökkunar á fullunninni vöru. Samherji er jafnframt stærsti framleiðandi eldisbleikju í heiminum.

Eldisgarður á Reykjanesi

Í undirbúningi er nú spennandi hringrásarverkefni í Auðlinda- garðinum á Reykjanesi. Þar mun Samherji byggja eldisgarð í nálægð við Reykjanesvirkjun og nálægð við ströndina, þar sem ýmist er nýttur jarðsjór eða ylsjór sem til fellur í virkjuninni en rynni annars ónýttur til sjávar. Við framleiðsluna verða til verðmætar aukaafurðir sem nýtast munu öðrum fyrirtækjum í sinni starfsemi eins og mjöl og lífrænn úrgangur. Eldisgarðurinn verður því ein hagkvæmasta og umhverfisvænasta fiskeldisstöð í heimi. Byggt verður í þremur áföngum og er áætlað að fullbyggður eldisgarður muni geta framleitt um 40.000 tonn af fiski á ári.