Gústaf Baldvinsson ráðinn framkvæmdastjóri sölu- og markaðssviðs Samherja hf.

09.06.2001
Gústaf Baldvinsson ráðinn framkvæmdastjóri sölu- og markaðssviðs Samherja hf.
Gústaf Baldvinsson hefur verið ráðinn framkvæmdastjóri sölu- og markaðssviðs Samherja hf. Um er að ræða nýtt starf hjá Samherja en veruleg aukning í umsvifum félagsins á hinum ýmsu sviðum sjávarútvegs hafa kallað á markvissara stjórnskipulag innan þess. Ráðning Gústafs í starf framkvæmdastjóra sölu- og markaðssviðs er liður í því auk þess sem hún styrkir stöðu Samherja enn frekar á núverandi mörkuðum félagsins.

Gústaf mun hafa aðsetur í Englandi en þar hefur hann starfað við markaðssetningu á afurðum Samherja síðastliðin 13 ár. Hann er jafnframt framkvæmdastjóri Seagold Ltd., dótturfyrirtækis Samherja hf. á Bretlandseyjum, og mun gegna því starfi áfram meðfram sínu nýja starfi.

Tveir sölustjórar starfa innan sölu- og markaðssviðs Samherja hf. og hafa þeir aðsetur í höfuðstöðvum félagsins á Akureyri. Birgir Össurarson hefur starfað hjá félaginu í 9 ár en hann hefur umsjón með sölu á rækju, sjófrystum og landfrystum afurðum. Einar Eyland hefur starfað hjá félaginu í 11 ár en hann sér um sölumál sem tengjast uppsjávarafurðum, lagmeti, kavíar og laxi.
Til baka