Hagnaður Samherja fyrir skatta tæpir fjórir milljarðar króna
Samkvæmt ársreikningi Samherja hf. fyrir árið 2005, sem stjórn félagsins samþykkti á stjórnarfundi sínum í dag, nam hagnaður Samherja 3.104 milljónum króna samanborið við 2.914 milljóna króna hagnað árið áður.
Rekstrartekjur samstæðunnar námu 21.291 milljón króna og jukust um ríflega 27% frá árinu áður. Aukningin stafar af stærstum hluta af áhrifum dótturfélaga sem nú eru að fullu inni í rekstrartekjum ársins 2005 auk sölu fastafjármuna. Rekstargjöld ársins voru 17.370 milljónir og hagnaður fyrir afskriftir og fjármagnsliði (EBITDA) var 3.921 milljón. Afskriftir voru 1.459 milljónir króna og voru fjármagnsliðir voru jákvæðir um 1.227 milljónir. Hlutdeild í hagnaði hlutdeildarfélaga nam 195 milljónum, hagnaður fyrir tekjuskatt var 3.884 milljónir og hagnaður eftir tekjuskatt og hlutdeild minnihluta nam 3.104 milljónum króna eins og áður segir. Veltufé frá rekstri var 1.416 milljónir króna og handbært fé frá rekstri 1.012 milljónir.
Heildareignir samstæðunnar í árslok 2005 voru bókfærðar á 28.687 milljónir króna. Skuldir og skuldbindingar samstæðunnar námu 21.233 milljónum króna, hlutdeild minnihluta í eigin fé nam 361 milljón og var bókfært eigið fé samstæðunnar í árslok 7.094 milljónir króna. Í árslok var eiginfjárhlutfall samstæðunnar 25% en var áður 43% og stafar lækkunin af samruna við Fjárfestingafélagið Fylki ehf. en við samrunann lækkar eigið fé Samherja um 6.885 milljónir króna.
Nettóáhrif dótturfélaga á rekstur Samherja voru neikvæð um 240 milljónir króna á árinu og munar þar mestu um áhrif Oddeyrar ehf. sem rekin var með verulegu tapi á árinu. Á hinn bóginn skila öll erlend dótturfélög Samherja góðum hagnaði.
Þann 15. mars síðastliðinn samþykktu stjórnir Samherja hf. og Fjárfestingafélagsins Fylkis ehf. áætlun um samruna félaganna. Samruninn miðast við 30. september 2005 og fá hluthafar í Fjárfestingafélaginu Fylki ehf. hlutabréf í Samherja hf. að nafnvirði 54 milljónir króna sem gagngjald fyrir hlutabréf sín.
Þrátt fyrir að úthlutaður loðnukvóti á síðustu vetrarvertíð hafi verið mun minni en væntingar stóðu til og vertíðin staðið stutt, eru horfur fyrir árið 2006 þokkalegar. Skýrist það annars vegar af góðu verði fyrir afurðir á helstu mörkuðum félagsins og hins vegar að gengi íslensku krónunnar er að færast nær því gildi sem telja má viðunandi fyrir starfsumhverfi íslenskra útflutningsgreina.
Uppgjör Samherja 31.desember 2005
Lykiltölur 31.desember 2005
