Kaupum Samherja fagnað

Guðmundur Kristjánsson, forstjóri Brims, og Þorsteinn Már Baldvinson, forstjóri Samherja handsala kaupin fyrir framan myndir af togurum ÚA.

Einhugur í bæjarstjórn

Bæjarstjórn Akureyrar fagnaði með 11 samhljóða atkvæðum kaupum Samherja á starfsemi Brims á Norðurlandi á fundi sínum þriðjudaginn 3. maí.  Þetta kemur fram í sérstakri ályktun sem samþykkt var á fundinum.

Bæjarstjórnin leggur áherslu á að með kaupunum sé ljóst að rekstur fiskvinnslu í bænum standi áfram á traustum grunni. Hið nýja félag, sem stofnað sé um reksturinn, fái nafnið Útgerðarfélag Akureyringa og lýsa bæjarfulltrúarnir þeirri von sinni að það muni bera nafn með rentu.

Í ályktuninni er einnig krafist lausnar í deilum um fiskveiðistjórnina í ljósi vandans sem fyrir liggur í atvinnu- og kjaramálum. Orðrétt segir í samþykkt bæjarstjórnar:

„Mál er að deilum um fiskveiðistjórnunarkerfið ljúki með samkomulagi og málamiðlun. Úrbætur í atvinnu- og kjaramálum við núverandi aðstæður þola ekki bið.
Bæjarstjórn hvetur stjórnvöld til þess að skapa sjávarútvegnum traustan rekstrargrundvöll og öryggi til framtíðar. Það er ein af mikilvægum forsendum sóknar í atvinnumálum við Eyjafjörð og í sjávarbyggðum landið um kring.“