Komið með alla hausa að landi

19.12.2001
Nýverið var ýtt úr vör verkefni á frystitogurum Samherja sem gengur út á að hirða alla þorskhausa sem til falla við vinnsluna. Þeir eru frystir um borð og þegar í land er komið fara þeir til vinnslu í hausaþurrkun félagsins á Hjalteyri og Dalvík. Einnig hafa hausarnir verið fluttir út frosnir.

„Við lítum á þetta sem stórt skref í þá átt að fullnýta aflann á togurunum. Þá skapast með þessu meiri vinna í hausaþurrkuninni og að sjálfsögðu aukin verðmæti,“ segir Birgir Össurarson, sölu- og markaðsstjóri Samherja.

Mikilvægt að vel takist til

Hann leggur áherslu á að nokkurn tíma geti tekið að þreifa sig áfram með heppilegasta fyrirkomulagið, t.d. varðandi geymslu á hausunum um borð og fleira í þeim dúr. Um verulegt magn er að ræða og mikilvægt upp á framhaldið að vel takist til þannig að verkefnið reynist arðbært. „Sjávarútvegsfyrirtæki á borð við Samherja eiga allt undir því að auðlindin gefi sem mest af sér og að gengið sé um hana með skynsamlegum hætti. Innan Samherja er jafnan kappkostað að ryðja brautina með nýjungar og framþróun inn sjávarútvegsins og við lítum á þetta verkefni sem lið í því,“ segir Birgir en bætir því við að fleiri fyrirtæki séu með svipuð verkefni í gangi.

Til baka