Mottumarssokkar fyrir alla karla hjá Samherja
Krabbameinsfélag Íslands tileinkar körlum með krabbamein marsmánuð. Mottumars er árvekni- og fjáröflunarátak félagsins og í ár er sérstök áhersla lögð á tengingu lífsstíls og krabbameina.
Samherji hefur um árabil styrkt þetta átak með því að kaupa sokka handa körlum sem starfa hjá félaginu. Fyrstu sokkarnir voru afhentir körlum í fiskvinnslunum á Dalvík og Akureyri.
„Krabbameinsfélagið vill í Mottumars vekja athygli á að bæði óheilbrigðar og heilbrigðar lífsvenjur verða til á löngum tíma. Skilaboðin eru einföld. Lífsstíll er ekkert til að grínast með, hann er þvert á móti dauðans alvara,“ segir á heimasíðu Krabbameinsfélagsins
Lífstíll skiptir máli
Starfsemi Krabbameinsfélagsins byggir á sjálfsaflafé, stuðningur almennings og fyrirtækja er því grundvöllur þess að félagið geti haldið úti öflugri starfsemi.
„ Að minnsta kosti þriðja hvert krabbameinstilvik tengist lífsstíl. Þó að enginn sé öruggur er hægt að draga úr líkum á krabbameinum með heilsusamlegum lífsstíl. Þar getum við svo sannarlega gert betur og tilfinningin er að of margir karlmenn taki lífsstíl sinn ekki nógu alvarlega. Því viljum við breyta og leggjum áherslu á að öll skref í rétta átt að bættum lífsstíl séu til bóta og það sé aldrei of seint,“ segir jafnframt á heimasíðu Krabbameinsfélagsins.
Snertir allar fjölskyldur
Anna María Kristinsdóttir mannauðsstjóri Samherja segir að fyrirtækið sé stolt og þakklátt Krabbameinsfélaginu fyrir þetta árlega átak.
„ Við höfum í gegnum tíðina stutt Mottumars með mikilli ánægju. Krabbamein er sjúkdómur sem snertir marga og gerir vart við sig fyrr eða síðar hjá flest öllum fjölskyldum landsins. Þessu árvissa átaki er ætlað að vekja sem flesta til vitundar um alvarleika krabbameina, sokkarnir og aðrir þættir í Mottumars vekja okkur til umhugsunar um mikilvægi þess að huga að heilsunni og góðum lífstíl, þannig að ég vona að karlarnir klæðist þessum sokkum sem oftast.“
