Samherji „Framúrskarandi fyrirtæki“ ársins 2013
- Samkvæmt lista Creditinfo
Samherji hlaut í gær viðurkenningu sem „Framúrskarandi fyrirtæki“ ársins 2013. Samherji varð efst í hópi stórra fyrirtækja og listans í heild og er þar með metið traustasti greiðandi íslenskra fyrirtækja í dag.
„Útnefning sem þessi er að sjálfsögðu heiður og viðurkenning til Samherja og starfsfólks okkar á því starfi sem við höfum unnið í rekstri undanfarin ár við krefjandi aðstæður. Það er alltaf gaman þegar eftir því er tekið og ánægjulegt að fjallað sé um jákvæða hluti opinberlega,“ segir Sigursteinn Ingvarsson, fjármálastjóri Samherja. Hann veitti verðlaununum viðtöku fyrir hönd félagsins úr hendi Bjarna Benediktssonar fjármálaráðherra við hátíðlega athöfn á Hilton Nordica í gær að viðstöddu fjölmenni.
“Framúrskarandi fyrirtæki ársins” er viðurkenning sem Creditinfo veitir árlega og vekur viðburðurinn ávallt athygli í viðskiptalífinu. Á listanum eru 462 fyrirtæki, eða um 1,4% af þeim 33.000 fyrirtækjum sem skráð eru á Íslandi. Með valinu er veitt viðurkenning fyrir stöðugleika og ráðdeild í rekstri og þurfa fyrirtækin að uppfylla ákveðin skilyrði er varða rekstur og greiðslugetu þrjú ár í röð til að komast á listann.
|
|
 Sigursteinn tekur við viðurkenningunni fyrir hönd Samherja |
|
|
