Seagold Ltd. á Donington Catering Expo 2005
Á hverju ári eru haldnar ýmsar sýningar sem viðkoma sjávarútvegi. Undanfarin ár hefur Samherji hf. og dótturfyrirtæki þess einna helst tekið þátt í tveimur þeirra; annars vegar bresku sýningunni “Donington Catering Expo” og hins vegar stærstu sjávarútvegssýningu heims “European Seafood Exposition” sem haldin er árlega í Brussel.
Dagana 10. og 11. apríl sl. var dótturfyrirtæki Samherja, Seagold Ltd., sem hefur höfuðstöðvar í Hull í Bretlandi, með stóran og áhugaverðan sýningarbás á “Donington Catering Expo” 2005. Tæplega hundrað sýningarbásar voru á svæðinu og var margt í boði fyrir gesti og þátttakendur.
 Starfsfólk Samherja og Seagold. Hanna Dóra, Mike, Fjóla, Jónas og Ragna. |
 Hanna Dóra ræðir við áhugasaman kaupanda. |
|
|
Meðal þeirra sem sækja sýninguna eru breskir kaupendur, sem kaupa og selja fisk auk annars sem viðkemur matarmenningu á Bretlandseyjum. Margir þeirra heimsóttu sýningarsvæði Seagold en fimm starfsmenn Samherja og Seagold stóðu vaktina og svöruðu spurningum gesta.
Íslenskur fiskur var í boði hjá nokkrum aðilum sem buðu gestum að bragða á þjóðarrétti Breta, “Fish and chips”, en einnig var til sýnis frosinn fiskur – eins og margir gestanna eru vanir að handfjatla. Gaman var að fylgjast með bresku börnunum þegar þau komu auga á fiskiflökin í kælinum en börnin eru greinilega ekki vön að sjá fisk í þessari mynd!
Á sýningum sem þessum staðfestist mikilvægi þess að vera í góðu sambandi við viðskiptavinina; bæði þá sem kaupa fiskinn í gámavís og þá sem láta sér nokkra kassa duga í einu. Báðir þessi hópar hafa sína skoðun á því sem verið er að gera. Ljóst var af viðtölum við viðskiptavini á sýningunni að almenn ánægja er ríkjandi á meðal þeirra með viðskiptin við Seagold/Samherja. Margir lýstu yfir ánægju sinni með nýja stærðarflokkun á ýsu- og þorskflökum sem Seagold/Samherji hafa verið að bjóða upp á og vildu fá að vita hvenær framboð á þeirri vöru yrði meira og stöðugra en nú er.
