Stefnt á þriggja stafa tölu
07.11.2001
Baldvin Þorsteinsson EA-10
„Jú, ég get staðfest að það er nokkur fótur fyrir þessu," segir Hákon Þröstur Guðmundsson, skipstjóri, þegar sagan er borin undir hann en bætir við að auðvitað hefði þetta allt verið meira í gamni en alvöru. „Raunar var þetta markmið til komið fyrir áeggjan Þorsteins Más. Hann hringdi í okkur út á sjó eins og stundum áður til að fylgjast með hvernig gengi og skaut því að svona í leiðinni hvort við myndum nokkuð koma inn fyrr en aflaverðmætið hefði náð þriggja stafa tölu. Auðvitað urðum við að bregðast við því og standa okkur," segir Hákon Þröstur.
Óvenju mikil ýsuveiði
Að sögn Hákonar byrjaði túrinn fyrir austan land en síðan færðu menn sig á Vestfjarðamið. Megnið af fiskinum var unnið fyrir Bandaríkjamarkað. Aflinn var sem fyrr segir um 460 tonn. Stærstur hluti þess var þorskur en þó var ýsuveiðin óvenju mikil að þessu sinni, eða 130 tonn. Því má raunar bæta við að Baldvin Þorsteinsson EA var aflahæstur íslenskra togara á síðasta fiskveiðiári samkvæmt tölum frá Fiskistofu og nam afli skipsins þá alls 6.574 tonnum.
