Stjórn Samtaka atvinnulífsins um borð í Vilhelm EA

Stjórn Samtaka atvinnulífsins hélt stjórnarfund á Akureyri í gær. Í tengslum við fundinn heimsóttu stjórnarmenn nokkur fyrirtæki á Akureyri og var Samherji í þeim hópi. Þar sem flaggskip Samherja, Vilhelm Þorsteinsson EA 11, liggur við bryggju þessa dagana, aldrei þessu vant, þótti tilvalið að bjóða stjórninni um borð.

Nokkrir af stjórnarmönnum Samtaka atvinnulífsins í brúnni á Vilhelm, hlýða á mál Kristjáns Vilhelmssonar, útgerðarstjóra. mynd mó

Mikil umsvif fylgja þeim endurbótum sem verið er að gera á fjölveiðiskipum Samherja þessa dagana og má áætla að um 70-80 manns komi að þeim verkefnum.        mynd KK/Mbl

Það var ekki annað að heyra á stjórnarmönnum Samtaka atvinnulífsins en að þeim þætti þetta skemmtileg upplifun. Voru þeir fræddir um þá starfsemi sem fer fram um borð sem og aðra starfsemi Samherja hf.

70-80 manns í viðhaldsverkefnum
Bæði fjölveiðiskip Samherja, Vilhelm Þorsteinsson EA 11 og Baldvin Þorsteinsson EA 10, liggja nú við festar í Akureyrarhöfn. Verið er að endurnýja hluta vinnslubúnaðar skipanna að lokinni loðnuvertíð og búa þau til veiða úr norsk-íslenska síldarstofninum þegar síldarvertíðin hefst í maí. Jafnframt er tækifærið notað til að sinna venjubundnu viðhaldi skipanna tveggja.

Mikil umsvif fylgja þessum endurbótum. Til marks um það má nefna að 70-80 manns eru að vinna um borð í skipunum þessar þrjár vikur sem skipin eru við landfestar. Meirihluti þeirra eru iðnaðarmenn frá fjölmörgum þjónustufyrirtækjum á Eyjafjarðarsvæðinu og víðar. Er þetta enn eitt dæmið um þau miklu margfeldisáhrif sem starfsemi Samherja hefur.