Um eitt þúsund manns á árshátíð Samherja í Póllandi
Árshátíð Samherja verður haldin nk. laugardag í Sopot í Póllandi. Um eitt þúsund manns fljúga utan í samtals sex þotum. Tvær fyrstu þoturnar fljúga frá Akureyri í dag.
Þetta er í þriðja sinn sem árshátíð Samherja er haldin í Póllandi.
Öll skip félagsins eru komin til hafnar og engin vinnsla verður í vinnsluhúsum félagsins í þrjá daga.
„ Síðasta árshátíð Samherja var haldin fyrir um þremur árum, einnig í Sopot enda eru allar aðstæður þar mjög góðar.
Þetta er um margt kærkomið frí, okkur hefur til þessa tekist að tryggja starfsemi í landvinnslunni alla daga ársins, fyrir utan hefðbundin sumarleyfi. Starfsfólkið, bæði til sjós og lands, á því sannarlega skilið að skemmta sér saman og treysta um leið vinaböndin enn frekar.
Undirbúningur árshátíðarinnar er eðlilega mikill, enda er þetta stór hópur. Landslið íslensks tónlistarfólks er með í för, sem sér um að allir skemmti sér konunglega.
Fyrri árshátíðir í Póllandi hafa tekist afskaplega vel, þannig að það er mikil tilhlökkun meðal starfsfólks og gesta,“ segir Anna María Kristinsdóttir mannauðsstjóri Samherja.
