Fréttir

Vinnsla í frystihúsi Samherja á Dalvík hefur gengið mjög vel að undanförnu. Í síðustu viku var framleiðslumet ársins t.d. bætt í tvígang, fyrst á miðvikudaginn þegar unnið var úr 37,4 tonnum af hráefni og síðan aftur daginn eftir en þá voru unnin 37,5 tonn. Að sjálfsögðu var starfsfólki boðið upp á rjómatertu báða dagana af þessu tilefni.

Skapar mun meiri verðmætiSíldarfrysting er hafin hjá Samherja í Grindavík. Þetta er í fyrsta sinn sem síld er fryst hjá fyrirtækinu en frysting skapar mun meiri verðmæti en bræðsla. Allt að 40 manns munu starfa við frystinguna þegar hún verður komin í fullan gang.

Margrét EA kom til Stöðvarfjarðar í gærmorgun með um 50 tonn af þorski. Bróðurpartur aflans fór til vinnslu í frystihúsi Samherja á staðnum. Margrét hélt síðan aftur til veiða upp úr hádegi. Í gærmorgun sást til sólar á Stöðvarfirði sem ekki hefur gerst u.þ.b. tvo mánuði. „Nú er því mikið léttara yfir bæjarbúum og við reiknum með hafa fengið okkar skerf af votviðrinu í bili," segir Magnús Helgason, frystihússtjóri Samherja.

Stöðug vinnsla hefur verið í frystihúsi Samherja hf. á Stöðvarfirði að undanförnu en þar starfa að jafnaði 30 manns. Þar er unninn bolfiskur og sjá ísfiskskip Samherja um að afla hráefnis til vinnslunnar.

Björgvin EA 311, frystitogari Samherja, kom til hafnar í Tromsö í Noregi í gærmorgun eftir vel heppnaða veiðiferð í Barentshafi. Afli skipsins er um 600 tonn af þorski sem fékkst innan rússnesku lögsögunnar. Aflaverðmætið nemur tæpum 110 milljónum króna og má fullyrða að þetta sé besti túr sem íslenskt skip hefur gert í Barentshaf frá því að gengið var frá samningum um veiðar Íslendinga á þessu svæði.

Í undirbúningi er að ráðast í breytingar á fjölveiðiskipinu Þorsteini EA þannig að um borð verði settur fullkominn búnaður til vinnslu og frystingar á síld og kolmunna. Ef áætlanir ganga eftir mun þetta gerast að lokinni loðnuvertíð næsta vor.

Um þessar mundir eru fjögur af skipum Samherja á ísfiskveiðum, sem er meira en oft áður. Þetta eru Björgúlfur EA, Kambaröst SU, Hjalteyrin EA og Margrét EA. Athygli kann að vekja að sjá Margréti í þessum hópi þar sem hún er útbúin sem frystiskip. Með aukinni árherslu Samherja á landvinnslu er nauðsynlegt að treysta hráefnisöflunina og því var ákveðið að gera togarann út á ísfiskveiðar um sinn.

Í dag kl. 16:00 var undirritaður samningur á milli Sæblikans ehf. og finnska fyrirtækisins Bauckman OY um sölu á um 20.000 tunnum af saltsíld til Finnlands. Bauckman OY er stórt á sínu sviði og hefur um 50% hlutdeild á finnska markaðinum fyrir saltsíld. Þær 20.000 tunnur sem hér um ræðir láta nærri að vera um fjórðungur af ársframleiðslunni hérlendis.

Með vísan til 26. gr. laga nr. 34/1998 tilkynnist hér með að Samherji hf. hefur í dag keypt 14,7% eignarhlut í Íslandslaxi hf. í Grindavík og nemur kaupverð eignarhlutans 51 milljón króna. Fyrir kaupin átti Samherji 68 milljónir króna að nafnverði í Íslandslaxi en á nú 88 milljónir króna að nafnverði, eða 64,7% alls hlutafjár í félaginu.

Hagnaður fyrir afskriftir og fjármagnsliði ríflega tvöfaldaðist á milli ára –en félagið gert upp með tapi vegna umtalsverðs gengistapsRekstur Samherja gekk mjög vel á fyrri hluta ársins og var fjármunamyndun frá rekstri meiri en nokkru sinni fyrr í sögu félagsins. Veltufé frá rekstri nam 1.150 milljónum króna hjá samstæðunni, samanborið við 563 milljónir á sama tímabili í fyrra. Hagnaður fyrir afskriftir og fjármagnsliði nam 1.612 milljónum króna og er um meira en tvöföldun að ræða á milli ára. Hins vegar voru hreinir fjármagnsliðir neikvæðir um tæpar 1.300 milljónir króna á tímabilinu, og er félagið gert upp með 345 milljóna króna tapi á tímabilinu.