Fréttir

Fréttatilkynning:  Aðalsteinn Helgason, framkvæmdastjóri landvinnslu Samherja, hefur ákveðið að láta af störfum hjá félaginu á þessu ári. Aðalsteinn hefur starfað hjá Samherja og tengdum félögum frá árinu 1992 eða samtals í tólf ár. Í sumar og fram á haust mun Aðalsteinn vinna við erlend verkefni sem tengjast starfsemi Samherja. Við starfi Aðalsteins tekur Gestur Geirsson, sem hefur stjórnað rækjuvinnslu félagsins undanfarin ár. Gestur útskrifaðist sem sjávarútvegsfræðingur frá Háskólanum á Akureyri árið 1995 og hefur starfað hjá Samherja frá þeim tíma. Breytingarnar taka gildi 1. júlí nk.  

Eins og alltaf í kringum sjómannadaginn var mikið um dýrðir á Akureyri um helgina, hátíðahöld bæði á laugardag og sunnudag. Skip Samherja voru óvenjumörg við bryggju á Akureyri að þessu sinni og settu svip sinn á hafnarlífið.

Arctic Warrior sem gerður er út af Boyd Line í Bretlandi, kom að landi í gær eftir 6 vikna veiðiferð í Barentshafi. Skipið var á þorskveiðum og verið er að landa úr skipinu í dag 360 tonnum af þorskafurðum, að verðmæti um 120 milljónir króna.

Samherji hf. var rekinn með 638 milljón króna hagnaði á fyrsta ársfjórðungi  2004. Hagnaður fyrir afskriftir og fjármagnsliði (EBITDA) var 692 milljónir króna, eða 19,8% af rekstrartekjum. 

Vilhelm Þorsteinsson EA 11 landar í kvöld á Neskaupstað fyrstu síld sumarsins.  Landað verður tæpum 500 tonnum af frosnum síldarflökum, sem voru unnin úr stórri og góðri síld. Síldin veiddist á alþjóðlega hafsvæðinu (síldarsmugunni) og við 200 mílna landhelgislínuna.   Afurðirnar eru seldar og fara aðallega á markað í Póllandi, Þýskalandi, Litháen og Rússlandi. 

Þriðjudaginn 4. maí var opnuð sýningin “European Seafood Exposition 2004” í Brussel í Belgíu en þar er um að ræða eina stærstu sjávarútvegssýningu sem um getur í heiminum.

Í dag lögðu Hríseyjan EA og Seley SU af stað í sína síðustu ferð. Skipin hafa verið seld í brotajárn til Greno í Danmörku eftir að hafa legið í Akureyrarhöfn um árabil. Hríseyjan EA (áður Arnar HU) var smíðuð í Japan 1973 og hefur verið í eigu Samherja hf. frá árinu 1995. Seley SU (áður Arnarnúpur ÞH) var smíðuð á Akranesi 1980 og hefur verið í eigu Samherja hf.frá árinu 1998.Seley að leggja af stað með Hríseyjuna í togi

Aðalfundur Samherja 2004:Á aðalfundi félagsins sem haldinn var í dag var samþykkt að greiða 25% arð til hluthafa. Arðgreiðslan fer fram 12. maí nk. Þá var ennfremur með vísan til 55. gr. hlutafélagalaga nr. 2/1995, samþykkt tillaga að heimila félagsstjórn á næstu 18 mánuðum að kaupa bréf í Samherja hf. að nafnvirði allt að kr. 166.000.000,- . Kaupverð bréfanna má verða allt að 10% yfir meðal söluverði, skráðu hjá Verðbréfaþingi Íslands á síðasta tveggja vikna tímabili áður en kaupin eru gerð. Í þessu skyni er félagsstjórn heimilt að ráðstafa allt að kr. 1.660.000.000,- ?. Í stjórn Samherja voru kosnir eftirtaldir aðilar: Finnbogi Jónsson,Óskar Magnússon, Jón Sigurðsson, Gunnar Felixsson og Eiríkur Jóhannsson Til vara í stjórn voru kosnir: Jóhannes Geir Sigurgeirsson og Kristján Jóhannsson Endurskoðandi Samherja hf. var kosinn Endurskoðun Akureyri KPMG, Arnar Árnason Þóknun til stjórnarmanna var samþykkt kr. 750.000.- fyrir liðið ár og kr.70.000.- á mánuði á árinu 2004. Í ræðu Þorsteins Más Baldvinssonar forstjóra félagsins kom fram að áætlanir gera ráð fyrir að velta og afkoma félagsins verði mjög svipuð og á árinu 2003. Stjórn félagsins kom saman í kjölfar aðalfundar og skipti með sér verkum þannig að Finnbogi Jónsson er stjórnarformaður, Eiríkur Jóhannsson varaformaður og Óskar Magnússon ritari.Finnbogi Jónsson, stjórnarformaður Þorsteinn Már Baldvinsson, forstjóri