Fréttir

Fréttatilkynning frá Samherja hf.:Gengið hefur verið frá samningum um sölu á 25% eignarhlut Samherja hf. í Kaldbak hf. og mun félagið fá sem endurgjald hlutabréf í Burðarás hf. að nafnvirði kr. 279.737.963. Samningur þessi er gerður með fyrirvara um samþykki hluthafafundar Burðarás hf. Gera má ráð fyrir að hagnaður Samherja vegna viðskiptanna verði ríflega einn milljarður króna.  

Skipverjar á fjölveiðiskipinu Vilhelm Þorsteinssyni EA 11 fengu góðar móttökur er skipið lagðist að bryggju á Akureyri um hádegið í dag. Á þeim 100 dögum sem liðnir eru frá 7.júní, er skipið lagði síðast upp frá Akureyri, hefur verið landað úr skipinu nær 8.000 tonnum af frystum síldarafurðum, að verðmæti tæplega 500 milljónum króna. Þar af veiddi skipið tæplega 15.000 tonn úr Norsk íslenska síldarstofninum og núna rúm 1000 tonn úr íslensku sumargotssíldinni. Kristján Þór Júlíusson bæjarstjóri á Akureyri sá ástæðu til að koma og taka á móti skipinu. Hann færði skipverjum veglega marsipantertu og óskaðu þeim til hamingju með árangurinn. Kristján Þór komst svo að orði við þetta tækifæri að velgengni skipsins væri hagur allra bæjarbúa sem og þjóðfélagsins alls. 

Guðmundur Valur Stefánsson framkvæmdastjóri Sæsilfurs hefur látið af störfum að eigin ósk.  Guðmundur er einn af stofnendum Sæsilfurs og hefur verið framkvæmdastjóri þess frá upphafi.  Stjórn Sæsilfurs þakkar Guðmundi fyrir vel unnin störf á tímabilinu og óskar honum velfarnaðar á nýjum vettvangi. Stjórn Sæsilfurs hefur í stað Guðmundar Vals ráðið Simin Pauli Sivertsen.  Simin er  42 ára Færeyingur frá Klaksvik.  Hann starfaði áður hjá East Salmon í Færeyjum í 12 ár, þar af sem rekstrarstjóri síðustu sex ár.  East Salmon er eitt af þremur stærsu framleiðendum á laxi í Færeyjum. 

Landssamband íslenskra útvegmanna hefur gefið Háskólanum á Akureyri fullkomna neðansjávarmyndavél sem afhent var við hátíðlega athöfn í skólanum í gær. Það var Björgólfur Jóhannsson, formaður LÍÚ sem afhenti Þorsteini Gunnarssyni, rektor Háskólans gjöfina, en í máli hans kom fram að hér er um að ræða afar fullkomið tæki sem skapar byltingarkenndar  umbætur á tæknilegri rannsóknagetu neðansjávar. 

Fréttatilkynning frá Samherja: Stjórn Samherja hf. samþykkti á fundi sínum í dag að kaupa 65% hlutafjár í þýska útgerðarfélaginu CR Cuxhaven Reederei GmbH, en fyrir átti félagið 35% eignarhlut í félaginu. Kaupverð nemur 17,3 milljónum evra. Jafnframt samþykkti stjórnin kaup dótturfyrirtækisins Onward Fishing Company Ltd. á 50% hlut í Boyd Line Ltd í Hull. Kaupverð 50% hlutar í Boyd Line nemur um 6,5 milljónum punda. Veiðiheimildir þeirra fjögurra fyrirtækja í Evrópusambandinu sem Samherji á nú aðild að nema um 20 þúsund þorskígildistonnum og er helmingur þessara veiðiheimilda eða um 10 þúsund tonn þorskur. Til samanburðar má geta að veiðiheimildir Samherja á Íslandsmiðum nema um 25 þúsund þorskígildistonnum.

Skip tengd Samherja hf. hafa verið við veiðar á Svalbarðasvæðinu að undanförnu.  Að sögn Brynjólfs Oddssonar skipstjóra á frystitogaranum Kiel hefur veiðin verið jöfn og stöðug og afar góð á undanförnum dögum. 

Akureyrin EA 110 lagðist drekkhlaðin að bryggju á Akureyri í morgun með um 565 tonn af frosnum afurðum, aðallega ufsa.  Aflinn var alls um 1.090 tonn en aflaverðmæti afurðanna er um 95 milljónir króna.

Sex mánaða uppgjör Samherja hf.:Samherji hf. var rekinn með 1.098 milljón króna hagnaði á fyrri árshelmingi  2004 en hagnaður á öðrum ársfjórðungi var 460 milljónir króna.

Vilhelm Þorsteinsson EA 11: Svalbarði var vettvangur áhafnarskipta hjá Vilhelm Þorsteinssyni EA 11, fjölveiðiskipi Samherja hf., í síðustu viku. Var þetta í fyrsta skipti sem leiguflugvél er send til Longerbyen á Svalbarða í þessum erindagjörðum. Flugvél frá Flugfélagi Íslands lagði upp frá Akureyri með nýja áhöfn áleiðis til Longerbyen og tók flugið um 5 klukkutíma með viðkomu í Tromsö. Daginn eftir var síðan flogið til baka án millilendingar og voru skipverjar ánægðir við heimkomuna á Akureyrarflugvöll eftir langt úthald. Í áhöfn Vilhelms eru að jafnaði 26 menn.